FANDOM


Coptic monks
Кирилица
ОБ ХОРѢ БРАТОВ ИЗ ПУСТЫНЬЕ


Правдоподобно повѣдка Отцев Пустынье, услушана мнојѫ нѣкъгды

автор: asank правописанье: MS Plus


Много лѣт тому, во  врѣмени, јегоже уже никто из днесь живѫћих льудиј уже не памѧтаје, нѣгдѣ на земјах далекого и горѧћого Југа,  на пустыни стал монастыр, а в монастырѣ жила мала скупшчина братов. Они жили в својим монастырѣ, и часове им прѣплывали на молитвѣ или работѣ.
Всьакој недѣлье, они брали своје кије и плѣцаки, и шли нѣколико километров к църкви, ктора была во сѫсѣдном селу. Они брати имали малы хор, и всьакократно пѣвали на мши разне пѣснье – а пѣвали истинно прѣкрасно. Кда льуди во църви слушали ихнье пѣванье,  говорили, иже јест тако лѣпо, иже можно бы  помыслити собѣ, иже хоры ангелов пѣвајѫт. Къгда брати пѣвали веселе пѣснье, льуди из села веселили сѧ заједно с ними, къгды пѣвали смѫтно, льуди  смѫтили сѧ, а понѣкъгда нѣкто поплакал си немножко: тако красно было пѣванье оных братов.
Брати были много радостни, иже могѫт пѣвати, а пѣваньем служити льудьам, и хвалити тым Господьа, и тако им медло плавалы лѣта.
Але пришло врѣмѧ, къгда прошле лѣта начѧли быти вельми многе: братам не было уже тако легко ходити километрами к църкви, а, со вѣком, такоже их слух стал выше злы.
Хоти брати тренировали много, ихно пѣванье не было уже тако красно како прѣдже, чисте гласы остарѣли сѧ, а нѣкоји братьа начѧли чинити погрѣшки во напѣвѣ.   Льуди не говорили им ничто, ибо были учтиви, але было все болье тѧжко им их слушати. Брати видѣли то, и смѫтили сѧ, иже не могѫт уже развесльати сърдц льудиј како прѣд давным врѣменем. В конци, по нѣкакој мши, једин из льуди пришел тихо к братьам, а сказал им абы не пѣвали вѧће ибо јест то му тѧжко к слушаньу.
Брати, услышавши то, были много смѫтни, але имали надѣјѫ, иже то был једнократны случај.
На жалость послѣ нѣколико врѣмене, начѧло приходити вѧће льудиј, а казати: "закльучте ваш хор, за что хћете пѣвати, ако ли то звѫчи тако бридко" або "тако недобро пѣванье не повинно быти на мши" или "јесте радовали льудиј а Господьа во прошлости, тутчас вам трѣба устати".
Братам было много тѧжко слушати таке словеса. Нѣкакого дньа, брати, послѣ спольного размысльаньа, пълни смѫтка, постановили завършити свој хор. Једин брат повѣдѣл: "мысльѫ, иже тако јест истинно најлучше".
Настѫпнѫ недѣльѫ они възмѫли своје кије, плѣцаки, текстове својих пѣсньи оставили дома и небыстро пошли к църкви. В половице стежки, брати увидѣли, иже напротив них стоји нѣкака особа.
Заинтересовани, подстѫпили к ньеј, а увидѣли, иже јест то ангел, кторы стоји на срѣдишчу драги, и со главојѫ вниз, плаче. 
Брати разчулили сѧ глѫбоко и начѧли пытати го: "Трѣба ли ти помоћи? Кто ти сдѣлал кривдѫ? За что јеси овако смѫтны?"
Ангел сказал: "Ах, брати, не само ја јесм смѫтны. Послал мѧ овамо Господь, ибо день оплакиваньа јест нынѣ во всѣм Нѣбеси."
Брати, прѣстрашени, запытали:"Что сѧ стало, чему така трагедија? Кто вам принесл толико смѫтка?"
"Ах, брати, не знајете ли вы, иже од къгда јесте скончили пѣвати, весь небески льуд плаче?"
Послѣ тых рѣчи ангел изникнѫл, а брати много подкрѣпјени и весели пошли к църкви, пѣвајѫћи, а хвальѫћи  Бога.



OB HORĚ BRATOV IZ PUSTYNJE

Pravdopodobno povědka Otcev Pustynje, uslušana mnojų někògdy

avtor: asank pravopisanje: MS Plus


Mnogo lět tomu, vò vrěmeni, jegože uže nikto iz dneś živųćih ljudij uže ne pamętaje, něgdě na zemjah dalekogo i goręćogo Juga, na pustyni stal monastyr, a v monastyrě žila mala skupščina bratov. Oni žili v svojim monastyrě, i časove im prěplyvali na molitvě ili råbotě.

Vsjakoj nedělje, oni brali svoje kije i plěcaki, i šli několiko kilometrov k cŕkvi, ktora byla vò sųsědnom selu. Oni brati imali maly hor, i vsjakokråtno pěvali na mšy råzne pěsnje – a pěvali istinno prěkrasno. Kda ljudi vò cŕvi slušali ihnje pěvanje, govorili, iže jest tako lěpo, iže možno by pomysliti sobě, iže hory angelov pěvajųt. Kògda brati pěvali vesele pěsnje, ljudi iz sela veselili sę zajedno s nimi, kògdy pěvali smųtno, ljudi smųtili sę, a poněkògda někto poplakal si nemnožko: tako krasno bylo pěvanje onyh bratov.

Brati byli mnogo radostni, iže mogųt pěvati, a pěvanjem služiti ljudjam, i hvaliti tym Gospodja, i tako im medlo plavaly lěta.

Ale prišlo vrěmę, kògda prošle lěta načęli byti veľmi mnoge: bratam ne bylo uže tako legko hoditi kilometrami k cŕkvi, a, so věkom, takože ih sluh stal vyše zly.

Hoti brati trenirovali mnogo, ihno pěvanje ne bylo uže tako krasno kako prědže, čiste glåsy ostarěli sę, a někoji bratja načęli činiti pogrěški vò napěvě. Ljudi ne govorili im ničto, ibo byli učtivi, ale bylo vse bolje tęžko im ih slušati. Brati viděli to, i smųtili sę, iže ne mogųt uže råzvesljati sŕdc ljudij kako prěd davnym vrěmenem. V konci, po někakoj mši, jedin iz ljudi prišel tiho k bratjam, a skazal im aby ne pěvali vęće ibo jest to mu tęžko k slušanju.

Brati, uslyšavši to, byli mnogo smųtni, ale imali nadějų, iže to byl jednokråtny slučaj.

Na žalosť poslě několiko vrěmene, načęlo prihoditi vęće ljudij, a kazati: "zaključte vaš hor, za čto hćete pěvati, ako li to zvųči tako bridko" abo "tako nedobro pěvanje ne povinno byti na mši" ili "jeste radovali ljudij a Gospodja vò prošlosti, tutčas vam trěba ustati".

Bratam bylo mnogo tęžko slušati take slovesa. Někakogo dnja, brati, poslě spoľnogo råzmysljanja, pòlni smųtka, postanovili zavŕšiti svoj hor. Jedin brat pověděl: "mysljų, iže tako jest istinno najlučše".

Nastųpnų neděljų oni vòzmųli svoje kije, plěcaki, tekstove svojih pěsnji ostavili doma i nebystro pošli k cŕkvi. V polovice stežki, brati uviděli, iže naprotiv nih stoji někaka osoba.

Zainteresovani, podstųpili k njej, a uviděli, iže jest to angel, ktory stoji na srědišču drågi, i so glåvojų vniz, plače.

Brati råzčulili sę glųboko i načęli pytati go: "Trěba li ti pomoći? Kto ti sdělal krivdų? Za čto jesi ovako smųtny?"

Angel skazal: "Ah, brati, ne samo ja jesm smųtny. Poslal mę ovamo Gospoď, ibo deń oplakivanja jest nyně vò vsěm Něbesi."

Brati, prěstrašeni, zapytali:"Čto sę stalo, čemu taka tragedija? Kto vam prinesl toliko smųtka?"

"Ah, brati, ne znajete li vy, iže od kògda jeste skončili pěvati, veś nebeski ljud plače?"

Poslě tyh rěči angel izniknųl, a brati mnogo podkrěpjeni i veseli pošli k cŕkvi, pěvajųći, a hvaljųći Boga.

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.